“O surf é o fío condutor de Galicia como destino turístico e deportivo”, destaca a Xunta
“O surf dálle vida a esta praia durante todo o ano” e reforza a posición dA Costa da Morte como Reserva Mundial de Surf promovida pola Deputación da Coruña
Carballo (A Coruña), 24 de setembro.- Boas ondas e un sol espléndido no arranque da II edición do Cabreiroá Junior Pro Razo (do 24 ao 28 de setembro), o evento deportivo da WSL (Liga Mundial de Surf) que pecha este verán de 2024 en augas galegas co campionato europeo sub-20 no que participan 187 surfeiros do circuíto continental dunha ducia de nacionalidades, desde Xapón a República Checa.
Case un quilómetro de area dourada e fortes ondas fronte ás illas Sisargas, dan forma á praia de Razo -protexida como parte da Rede Natura 2000-, un escenario sen igual para un evento que foi presentado hoxe oficialmente a pé de praia da man das autoridades públicas e patrocinadores privados que o fan posible.
“Sen esta paisaxe e sen estas ondas non sería posible esta feliz realidade”, destacou hoxe o alcalde, Evencio Ferrero, que expresou a súa satisfacción por ser o municipio anfitrión dun campionato da WSL que vai a máis, que xa ten instalada a súa base ama de cría na praia de Razo con varias carpas e jaimas nas que alternar o surf co lecer e o consumo.
”Cando nos xuntamos todas as Administracións e o empuxe privado, suceden estas cousas”, destacou Xosé Regueira, deputado provincial e concelleiro de Promoción e Turismo en Carballo, satisfeito polo curso dunha competición que chegou a Carballo para crecer e quedar.
“O surf dálle moita vida a este areal durante todo o ano”, engadiu, lembrando que Razo acuñou o primeiro surf camp de España en 1991, e xera un impacto positivo nos negocios hostaleiros da zona.
“O surf é o fío condutor de Galicia como destino turístico deportivo e sostible”, salientou Carmen Pita, directora de Promoción Turística da Xunta, mentres que Xosé Ramón Lete Lasa, Secretario Xeral para ou Deporte, puxo o acento en “a maridaxe entre turismo e deporte” como binomio de éxito e escaparate do potencial de Galicia con 1.500 quilómetros de costa, dos que 956 están na provincia da Coruña.
Na presentación deste mediodía, conducido polo surfeiro galego Gony Zubizarreta, tamén tomaron a palabra Melisa Palisardo, como representante de Gadisa, como parte do seu compromiso co deporte e a alimentación saudable, xunto a Manuel Eiroa, o representante de Cabreiroá, da corporación Hijos de Rivera, que dá nome ao evento.
“Sempre tratamos de buscar iniciativas con impacto positivo, de compromiso, esforzo e ambición por crecer como este campionato”, declarou Eiroa, xunto ao vicepresidente da Federación Galega de Surf (FGS), Mateo Saco, que agradeceu a oportunidade de que os novos surfeiros galegos poidan competir este martes en Razo, no Open Gallego, por lograr uns dos catro pases ou invitacións directas á competición principal (wildcards).
Por último, desde a organización Clube Praia de Pantín, Yago Barreto. agradeceu a implicación de Administracións Públicas -Concello de Carballo, Deputación da Coruña e Xunta de Galicia, a través de Turismo e Deporte Galego- en empuxar a terceira das tres probas que a liga Mundial de Surf (WSL) celebra en Galicia este verán 2024, coas praias da Coruña como escenario e escaparate mundial dunha costa na que sempre hai ondas.
200 SURFEIROS SUB 20 QUE PELEXAN POLA COROA DE EUROPA WSL
A proba JR1000 do Junior Tour a WSL (World Surf League) comezará este mércores ata as mangas finais do sábado 28 de setembro. Participan con case 200 novos surfeiros, -131 mozos e 56 mozas- de entre 12 e 20 anos. Entre as mozas, destaca a presenza da campioa do 2023, a surfeira vasca Anette González-Etxabarri ou Sol Borrelli, e entre os mozos, Lukas Skinner, Edoardo Poggi e os españois Jacobo Trigo ou o galego Manuel Fernández.
A de Razo será a última proba do circuíto WSL Junior Tour Europa e coroarase, do mesmo xeito que en 2023, non só aos campións da proba na Coruña, se non tamén a campións anuais da WSL na rexión, que comprende tanto Europa como Medio Oriente.