- Rider español acabou segundo na súa manga da ronda 2, por detrás do actual líder do World Longboard Championship Tour, o estadounidense Justin Quintal
- A previsión para mañá (xoves 29 de agosto) é que as condicións sexan aínda mellores para a práctica do Longboard, tras o bo espectáculo ofrecido durante a primeira xornada
A praia de Pantín foi o escenario este mércores 28 de agosto no que arrincou o ABANCA Galicia Classic Surf Pro, coa competición na modalidade de Longboard, incluída dentro do calendario do World Longboard Championship Tour, organizado pola World Surf League.
Nunha primeira xornada marcada polas boas condicións, púidose ver un bo espectáculo por parte dos participantes do cadro masculino da especialidade, que disputaron as dúas primeiras rondas.
Dentro do máis destacado, hai que facer mención á notable actuación do rider español José Luis Berasaluce que lle permitiu acceder a terceira ronda, tras acabar segundo na súa manga da ronda 2, xusto por detrás do actual líder da competición, o estadounidense Justin Quintal.
Berasaluce gañouse o dereito para competir no ABANCA Galicia Classic Surf Pro, tras conseguir o ‘ wildcard’ que estaba en xogo nos Triais de Doniños celebrados o pasado luns (26 de agosto).
O resto de ‘cabezas de serie’ seguen avanzando na competición. Tanto o segundo clasificado da xeral, o australiano Harrison Roach, como o hawaiano Kaniela Stewart, quinto clasificado, foron os vencedores nas súas mangas.
Xunto a eles tamén se clasificaron para a ronda 3: Lucas Garrido (Perú), Clement Roseyro (Francia), Clinton Guest, Anthony Spencer, Max Wenston, Jack Entwistle (Australia), Wenderson Biludo, Carlos Baía, Jefson Silva, Gabriel Nascimiento (Brasil), Taka Inoue (Xapón) e Joao Dantas (Portugal). Empezan a competición neste punto: Taylor Jensen e Tony Silvagni (Estados Unidos), terceiro e quinto clasificado respectivamente, e Edouard Delpero (Francia), noveno.
Doutra banda, quedaron fóra da proba contrapronóstico, o australiano Nic Jones, quinto no Mundial, e o brasileiro Phil Rajzman, noveno.
En canto aos resultados destacados do día, a mellor puntuación en ondas foi para Harrison Roach, con 7,33 puntos; mentres que a mellor puntuación acumulada nunha manga, foi para Justin Quintal, con 13,17 puntos.
No que ao cadro feminino refírese, realizouse o ‘check-in’, pero aínda non comezou a competición, polo que as primeiras rondas terán lugar este xoves (29 de agosto).
Cabe sinalar, que se prevén que as condicións serán aínda máis idóneas para a práctica do Longboard na segunda xornada, o que permitirá aos competidores ofrecer un espectáculo tan bo como o que se puido ver na primeira xornada na cita galega.
ABANCA Galicia Classic Surf Pro conta coa colaboración institucional de Xunta de Galicia (Turismo de Galicia, Xacobeo 2021, Deporte Galego, Galicia Calidade, Secretaria Xeral de Igualdade, Conselleria de Medioambiente), Deputación de A Coruña, Concello de Ferrol, Concello de Valdoviño, Sociedad Mixta de Turismo de Ferrol, Costa das Ondas y Federación Galega de Surf, así como as firmas ABANCA, ESTRELLA GALICIA, CABREIROA, HOSPITAL QUIRON, INTERMAX, VOLKSWAGEN YAÑEZ, TAGHEUER, JOYERIA JAEL, SIROKO,GADIS, GAM, ITG Y VAZVA.