O surfista vasco Yago Domínguez consegue a mellor onda do evento ata o momento con 9,23 sobre 10.
Incribles condicións de onda no segundo día de competición.
A acción continúa na segunda xornada da competición CABREIROÁ JUNIOR PRO FERROL 2022, cunhas condicións que só melloraron durante a mañá e os competidores dando o mellor de si e aproveitando ao máximo as ondas.
Os surfeiros vascos Yago Domínguez e Bitor Garitaonandia puxeron o listón ao conseguir as dúas mellores puntuacións pola mañá. Yago Domínguez tivo a mellor onda do evento ata o momento, cun espectacular 9,23 sobre 10, e asegurou que a súa mellor estratexia foi saber esperar e escoller ben as mellores ondas.
Pola súa banda, Bitor Garitaonandia acadou unha puntuación total de 16,50, a segunda máis alta da mañá, con dúas impresionantes ondas de 8,27 e 8,23 puntos sobre 10. “Doniños é unha praia na que me gusta moito facer surf, sempre hai moi boas ondas, e hoxe o meu obxectivo era gozar da miña serie e destas ondas, e conseguínoo”, dixo.
Os surfistas internacionais non foron menos, destacando tamén o portugués Afonso Antunes, o polaco Maksymilian Michalewski e a francesa Noe Ledee.
Maksymilian Michalewski rematou a súa serie en primeiro lugar tras conseguir unha das mellores ondas da mañá, con 8.33 sobre 10 e fíxoo “contento de estar de volta en Galicia e en Doniños”.
A competición da proba World Junior Tour da World Surf League (WSL) continúa na Praia de Doniños coa terceira xornada en categoría masculina.
